Prokuroria e Posaçme kundër Korrupsionit dhe Krimit të Organizuar (SPAK) ka mbyllur zyrtarisht hetimet dhe ka dërguar për gjykim një nga dosjet më të bujshme të viteve të fundit, me të pandehur ish-zëvendëskryeministren Belinda Balluku dhe 28 persona e kompani të tjera.
Sipas akuzës së ngritur nga prokurorët e posaçëm, hetimi ka zbërthyer një skemë të dyshuar korrupsioni, pastrimi parash dhe manipulimi të procedurave të tenderëve publikë me një vlerë totale që llogaritet rreth 400 milionë euro.
Çfarë përmban fashikulli i dërguar në GJKKO
Burime pranë organit të akuzës bëjnë me dije se në dosje janë administruar qindra dokumente financiare, komunikime elektronike dhe akte ekspertimi mbi kontratat e mëdha infrastrukturore e energjetike. Përveç zyrtarëve të lartë, nën akuzë janë vënë edhe administratorë biznesesh dhe subjekte tregtare që dyshohet se kanë përfituar fonde publike përmes garave të paracaktuara.
Gjykata e Posaçme (GJKKO) pritet të caktojë së shpejti seancën paraprake, ku do të vendoset kalimi i çështjes për gjykim në themel, një proces që po ndiqet me vëmendje të madhe nga opinioni publik dhe partnerët ndërkombëtarë.


