Mokasinet, një simbol i përjetshëm i elegancës dhe rehatisë së përditshme, kanë kaluar dekada të tëra modës, duke u vendosur si një domosdoshmëri e vërtetë në gardërobën e çdo gruaje. Të krijuara si këpucë për meshkuj, ato shumë shpejt pushtuan edhe botën e femrave, duke iu përshtatur në mënyrë perfekte çdo stili dhe rasti. Teksa çelin lulet e para të pranverës, ato rikthehen në modë për të ecur nëpër rrugët e qytetit, por si të përshtasni mokasinet në 2024?
Mokasini me një kostum, për ditën
Natyra e tyre klasike dhe formale i bën ato këpucë ideale për veshjet pranverore në zyrë. Edhe kur vishni modelet më klasike të zeza apo kafe, një kostum mund të shndërrohet në një ansambël dinamik dhe bashkëkohor. Pasarelat rekomandojnë të zgjidhni kostume me ngjyra pastel ose neutrale, me një këmishë të përshtatshme për një pamje të efektshme . Më pas zgjidhni mokasini penny në nuanca të kundërta për një efekt modern dhe të sofistikuar. Së fundi, mos harroni të shtoni një aksesor statik, si çanta për të kompletuar pamjen, sipas Living.
Me një fustan të gjatë me lule, për të kaluar kohën e lirë
Jo vetëm me pantallona. Mokasinet, madje edhe ato në versionet më të rafinuara, me kapëse bizhuteri, dyngjyrëshe apo të qëndisura, mund të përshtaten me fustane për t’u dukur shumë femërore. Me printe me lule, për të mishëruar thelbin e pranverës, ato luajnë me kontrastet mes stilit bukolik dhe atij formal, me nuanca dhe tekstura të kundërta, por harmonike. Ky kombinim është perfekt për raste casual-chic, të tilla si një mëngjes i vonë apo një shëtitje në qytet. Shtimi i një xhakete lëkure vintage dhe një palë çorape të bardha me kontrast të pashmangshëm do të zbusë sharmin bohem, duke e bërë veshjen më bashkëkohore dhe urbane.