Shuhet në moshën 91 vjeçare legjenda e volejbollit shqiptar Vangjel Koja.
Lajmi është bërë i ditur nga djali i tij, trajneri i ekipit të vajzave të volejbollit Korçar, Orlando Koja.
Volejbolli, bota e sportit në Shqipëri është në zi pasi Vangjel Koja ndërron jetë në moshën 91-vjeçare. Koja, ose siç njihej ndryshe si “babai” i volejbollit ishte një nga figurat me të shquara të këtij sporti.
Ish sportisti universal si atlet, basketbollist dhe volejbollist, kulmin e karrierës sportive e kishte si trajner i Dinamos në volejboll për meshkuj, ku vendosi diktatin e tij te kjo skuadër, kampione absolute në vitet ’70-’90 dhe ku arriti të hynte mes 4 më të mirave në Evropë.
Koja ka dhënë një kontribut të madh edhe si trajner i ekipit Kombëtar në volejboll, praktikisht të gjithë jetën e tij e vendosi në dispozicion të sportit. Ndarja nga jeta e Vangjel Kojës është një humbje e madhe për sportin shqiptar.
Homazhet do të mbahen këtë paradite në kishën e Shën Sotirit e më pas do ti jepet lamtumira e fundit legjendës së volejbollit shqiptar.
