Një nga veprat më të diskutueshme të artit bashkëkohor, banania e ngjitur me shirit ngjitës në mur, titulluar “Comedian”, e artistit italian Maurizio Cattelan, është shitur për 6,24 milionë dollarë në një ankand në Nju-Jork
Kjo banane e ngjitur në murë me nje ngjitëse është konsideruar si një nga veprat më të diskutueshme të artit bashkëkohor.
E titulluar “Comedian”, e artistit italian Maurizio Cattelan, është shitur për 6,24 milionë dollarë në një ankand në Nju-Jork.
Kjo shumë tronditëse theu pritshmëritë e ankandit, që parashikonin një çmim maksimal prej 1,5 milionë dollarësh.
Fituesi i ankandit ishte Justin Sun, një koleksionist kinez dhe themelues i një platforme kriptomonedhash, i cili e quajti këtë vepër “një fenomen kulturor që lidh botët e artit, memeve dhe teknologjisë”.
Në një deklaratë për mediat, Sun theksoi se kjo banane përfaqëson një simbol të rëndësishëm të kohës sonë dhe planifikoi ta konsumojë atë, duke e përshkruar si pjesë të “përvojës unike artistike”.
Kjo nuk është hera e parë që veprat e Cattelan provokojnë reagime të zjarrta. “Comedian” debutoi në 2019 në Art Basel Miami Beach, ku u shit për 120 000 dollarë. Megjithatë, ekspozita u bë edhe më e famshme kur artisti performues David Datuna e hoqi bananen nga muri dhe e hëngri përpara turmave të habitura, duke e cilësuar aktin si një performancë artistike.
Një vepër konceptuale, “Comedian” përfshin një banane dhe një shirit ngjitës të zakonshëm, të cilat zëvendësohen me çdo instalim të ri, sipas udhëzimeve të artistit. Koleksionisti merr një certifikatë autenticiteti dhe udhëzime për instalimin e veprës.
Shitja e fundit shënon një kapitull të ri për këtë vepër, që shumë e shohin si një sfidë për perceptimet mbi vlerën dhe qëllimin e artit. Siç theksoi David Galperin, drejtues i artit bashkëkohor për Amerikën “Kjo është një vepër që sfidon kufijtë e artit dhe i jep publikut mundësinë të përcaktojë vlerën e saj të vërtetë”.
