Liam Payne, ish-anëtar i grupit të njohur One Direction, është përcjell këtë të mërkurë për në banesën e fundit, ndërsa vdiq tragjikisht më 16 tetor.
Funerali u mbajt në Kishën e Shën Marisë në Amersham, Angli, dhe morën pjesë familjarët, miqtë e ngushtë dhe ish-anëtarët e grupit One Direction: Harry Styles, Zayn Malik, Niall Horan dhe Louis Tomlinson, si dhe ish-partnerja e tij Cheryl Cole, e cila është edhe nëna e djalit të tij 7-vjeçar, Bear.
Ceremonia ishte e mbushur me emocione, me një arkivol të zi të mbuluar me trëndafila të bardhë dhe dekorime që lexonin “djali” dhe “babi”. Prindërit e Liamit, Geoff dhe Karen Payne, ishin gjithashtu të pranishëm dhe shpesh u panë në lot.
Liam Payne ndërroi jetë pasi ra nga ballkoni i një hoteli në Buenos Aires të Argjentinës, ku ai kishte qenë për një koncert. Autopsia zbuloi alkool dhe substanca narkotike.
Pas vdekjes së tij, ndaj tre personave janë ngritur akuza për ngjarjes, si të dyshuar në dërgimin e substancave të ndaluara. Një nga ata është një person i afërt me Liamin që shpesh e vizitonte atë në hotel. Ceremonia u mbajt nën masa të rrepta sigurie për të shmangur grumbullimin e fansave të shumtë të tij.
