Natën e vrasjes, Tupac qëndronte ulur në makinën e tij BMW para selisë së kompanisë muzikore, kur një Cadillac i bardhë ndaloi para tij dhe sulmuesi hapi zjarr duke e qëlluar disa herë.
Tashmë vëllai i Tupac Shakur ka folur për hetimet e reja mbi vrasjen famëkeqe, pas arrestimit të ish-rivalit të Tupac, P. Diddy për trafik seksual dhe abuzime të shumta.
Në një intervistë me gazetarin Piers Morgan, Mopreme Shakur tregoi për dyshimet mbi mohimet e Diddy për përfshirje në sulmin fatal ndaj Tupac.
Ai tha se në 2008, Diddy i kishte telefonuar për t’i thënë se nuk kishte lidhje me vrasjen: “Ai ishte në Los Angeles asokohe, i kishte thënë një DJ në radio të më kontaktonte. Kjo ndodhi disa vjet pas vrasjes së Tupac.”
Mopreme vazhdon më tej: “Ne të gjithë i kishim dëgjuar zhurmat për lidhjet, dhe unë pranova të flas me të. Në thelb më thoshte se nuk kishte të bënte me vrasjen dhe unë i thashë se ‘e vërteta herët e vonë do të dalë. Të shikojmë’”.
“Ja ku jemi tani, 27 – 28 vjet më vonë dhe ajo deklaratë duket e dyshimtë, kjo bashkë me dyshimet e tjera që kishin njerëzit. Është koha që kjo të hetohet”, thotë vëllai i Tupac.
Në lidhje me historitë e mëparshme për mohimet e Diddy për lidhje me vrasjen e Tupac, gazetari e pyeti të vëllanë: “Mendoni se ishte një deklaratë e sinqertë?’
Mopreme u përgjigj: “Unë nuk besoj se ishte një deklaratë 100% e sinqertë, nuk e di cila është e vërteta”.
“A mendoni se ai gënjente?’ insistoi gazetari Piers.
“Ka shumë mundësi që të jetë ashtu”, u përgjigj Mopreme.
Intervista vjen në një kohë kur Diddy arrestohet për trafik seksual dhe detyrim të vajzave, shumë prej të cilave minorene, të merrnin pjesë në orgji me persona të famshëm të industrisë së muzikës, si dhe per krime të shëmtuara seksuale në “festat” e tij me të ftuar të pasur e të famshëm.
Prokurorët thonë se gjyqi i tij mund të zgjasë disa javë ndërsa avokati i Diddy thonë se një javë do të mjaftojë.
Tashmë familjarët e Tupac Shakur kanë pajtuar një avokat për të hetuar nëse Diddy ishte i përfshirë në vrasjen e reperit në 1996.
Ata kanë pajtuar avokatin e famshëm të New York, Alex Spiro, i cili përfaqëson aktualisht kryebashkiakun Eric Adams për akuzat e rryshfetit, dhe më parë ka përfaqësuar aktorin famëkeq Alec Baldwin për vrasjen e skenaristes së filmit të tij gjatë xhirimeve, duke i dhënë atij pafajësinë.
Më parë Diddy dhe reperi Notorious B.I.G, ishin në të ashtuquajtura banda rivale me Tupac në Kaliforni.
Notorious B.I.G u vra me armë në 1997 ndërsa për vdekjen e Tupac është ndaluar gangsteri vendas Duane Keith Davis, i cili ende pritet të dalë në gjyq, por më parë ka përmendur P. Diddy si të përfshirë.
I pyetur për arrestimin e vonuar, vëllai i Tupac, Mopreme tha: “U shokova që kishte një arrestim pas 27 vjetësh. Nuk dija ç’të mendoja për këtë, kishte kaluar shumë kohë”
I pyetur për lidhjet e të arrestuarit me Diddy, ai tha: “I kisha dëgjuar këto gjëra. Ai tani është në qeli, por si në New York dhe në Las Vegas, kishte grupe njerëzish të përfshirë”.
“Nuk e di për përfshirjen e Diddy. Ai ka qenë më parë artist i talentuar, por kur vëllai im vdiq u duk sikur ai mori shumë pushtet, pushtet absolut. Pushteti absolut korrupton këdo”.
I nxitur edhe një herë nga gazetari të thoshte nëse mendonte se Diddy kishte të bënte me krimin, Mopreme tha me hezitim: Duhet të tregohem i kujdesshëm, kjo është një çështje delikate, shumë delikate”, sipas rrjetit britanik Daily Mail.
