Zhytësit e angazhuar në kërkimet e një superjahti që u mbyt në brigjet e Siçilisë në Itali të hënën kanë gjetur trupat e 5 nga 6 pasagjerët e zhdukur dhe kanë nxjerrë në breg 4 prej tyre. Rojet bregdetare italiane nuk i kanë identifikuar zyrtarisht trupat që janë nxjerrë nga mbetjet e jahtit Bayesian, por të zhdukurit kanë qenë 4 britanikë dhe 2 amerikanë.
Mes të zhdukurve kanë qenë edhe Mike Lynch, një sipërmarrës teknologjik në Mbretërinë e Bashkuar, vajza e tij Hannah Lynch, kreu i “Morgan Stanley Bank International”, Jonathan Bloomer dhe gruaja e tij Judy Bloomer. Dy trupat e parë që u gjetën u dërguan në breg në portin Porticello të mërkurën pasdite. Disa orë më vonë dy trupa të tjerë u nxorën nga uji përpara se kërkimet të ndërpriteshin pasi ra nata.
Superjahti Bayesian u mbyt gjatë një stuhie të frikshme të hënën, rreth 700 metra larg bregut. Mendohet se ai u godit nga një tornado mbi ujë i cili bëri që anija të përmbyset dhe të fundoset 50 metra thellë në shtratin e detit. Autoritetet italiane deri më tani kanë refuzuar të identifikojnë të rikuperuarit, pavarësisht raportimeve nga media vendase dhe ndërkombëtare për disa prej emrave të tyre.
Kjo ka të ngjarë sepse ata presin të gjejnë të gjashtë trupat përpara se të kontaktojnë familjet e viktimave. Sipas ligjit italian, i vdekuri duhet të identifikohet zyrtarisht nga një anëtar i familjes ose një person i afërt me viktimat, përpara se vdekjet të bëhen zyrtarisht të certifikuara.
Më herët, kreu i agjencisë së mbrojtjes civile të Siçilisë, Salvatore Cocina tha se do të kishte një hetim në kohën e duhur, por prioriteti ishte gjetja e të gjithë atyre që ishin në bordin e anijes Bayesian. Neda Morvillo, një stiliste amerikane bizhuterish dhe bashkëshorti i saj Chris janë gjithashtu në mesin e të zhdukurve.
Shërbimet italiane të shpëtimit thanë se ekipi i zhytësve specialistë ishte penguar nga fakti që Bayesian është shtrirë anash në fund të shtratit të detit, me pikat e hyrjes së tij të mbuluara nga mbeturinat.
Bayesian, i cili ishte 56 m i gjatë dhe që mbante një flamur britanik, mbante 10 ekuipazh dhe 12 pasagjerë kur u fundos. Nga 22 personat në bord, 15 mbijetuan duke përfshirë një nënë britanike e cila tregoi se e mbajti vajzën e saj mbi sipërfaqen e detit për ta shpëtuar nga mbytja.
Trupi i kuzhinierit të jahtit, shtetasit kanadezo-antiguan Recaldo Thomas, u gjet të hënën. Gareth Williams, një mik i Thomas, i tha BBC-së se ai e njihte shefin e kuzhinës prej 30 vjetësh pasi ata ishin rritur së bashku në Antigua, ku Thomas jetonte gjatë sezonit jashtë sezonit të jahteve.
Pasagjerët në bord ishin mysafirë të Lynch, themeluesit të gjigantit të softuerit Autonomy dhe thuhet se ishin atje për të festuar lirimin e tij nga akuzat për një rast mashtrimi në SHBA. Lynch u lirua në qershor nga akuzat e shumta për mashtrim në lidhje me shitjen e Autonomy prej 11 miliardë dollarësh te gjiganti amerikan i kompjuterëve Hewlett-Packard në 2011.
