Zoologu britanik Adam Britton , i cili u arrestua në prill 2022 për një sërë veprash që lidhen me abuzimin seksual, torturimin dhe vrasjen e dhjetëra qenve në shtëpinë e tij në periferi, është dënuar me 10 vjet e pesë muaj burg nga një gjykatë australiane.
Akademiku 52-vjeçar, i cili konsiderohej ekspert i krokodilëve dhe kishte punuar me BBC-në për nevojat e dokumentarëve për zvarranikët, qëndroi pa fjalë para gjykatësit Michael Grant në Gjykatën e Darvin Crown sot për dënimin e tij, pasi më parë u deklarua fajtor dhe për 56 akuza me të cilat përballej.
Pasi paralajmëroi audiencën, se ata ishin gati të dëgjonin detaje të abuzimit monstruoz të kafshëve, gjykatësi Grant iu drejtua të akuzuarit, duke thënë se “shthurja e tij është aq e madhe sa që asnjë mendje njerëzore nuk mund ta kuptojë atë”. Britton u burgos për 10 vjet e pesë muaj, me një afat minimal prej gjashtë vjetësh, dhe iu ndalua të mbante përsëri ndonjë gjitar për pjesën tjetër të jetës së tij.
Ky ndalim i veçantë u vendos pas ndërhyrjes së avokatit të Britton, i cili argumentoi në gjykatë se ndalimi i përjetshëm i mbajtjes së kafshëve ishte një “masë ekstreme”. Sipas tij, i pandehuri duhet të ketë të drejtën të blejë një kafshë në një fazë të mëvonshme të jetës së tij dhe ndalimi nuk duhet të jetë i përjetshëm për shkak të “perspektivave të arsyeshme të riintegrimit”.
Sipas Daily Mail , disa anëtarë të audiencës u përlotën sot kur u lexuan detaje të akteve sadiste të Britton, të cilat rezultuan në vdekjen e 39 qenve, përfshirë nëntë këlyshë. Vlen të theksohet se një nga akuzat për të cilën ai u shpall fajtor ishte mbajtja dhe shpërndarja e materialeve të abuzimit seksual të fëmijëve.
Aktivitetet e çoroditura të zoologut të kafshëve filluan në vitin 2014 dhe zgjatën deri në arrestimin e tij në prill 2022, pak pasi një video që ai kishte ngarkuar në internet nga veprimet e tij të liga, u dërgua në mënyrë anonime në Autoritetin e Mbrojtjes së Kafshëve të Territorit Verior. Britton i filmoi shkeljet e tij në një ” dhomë torture ” që ai kishte ndërtuar dhe i shpërndau videot në internet duke përdorur një pseudonim, duke inkurajuar të tjerët të kryenin vepra të ngjashme dhe madje duke ofruar këshilla.
Dënimi i Britton shkaktoi zemërim nga grupet e mirëqenies së kafshëve në Australi, të cilët e konsideruan atë tepër të butë. Deputetja e drejtësisë së kafshëve në Neë South Ëales Emma Hurst tha se 52-vjeçari kishte kryer “akte të tmerrshme të abuzimit me kafshët” dhe se kishte një “lidhje të mirëdokumentuar midis mizorisë së kafshëve dhe mizorisë njerëzore ” . “Ky njeri është një rrezik për kafshët e tjera dhe komunitetin. U lehtësova kur dëgjova se do të kalojë disa vite në burg, pasi aty i takon, por dënimi nuk është aq i gjatë”.
Më parë, avokati i Britton lexoi në gjykatë një letër të shkruar nga klienti i tij, “duke kërkuar falje për dhimbjen që ka shkaktuar”.
“Unë marr përgjegjësinë e plotë për krimet që kam kryer ndaj qenve. Më vjen shumë keq për dhimbjen që u kam shkaktuar kafshëve të pafajshme, si dhe familjes, miqve dhe anëtarëve të komunitetit tim. Ju kam zhgënjyer të gjithëve dhe më vjen vërtet keq. Tani e kuptoj që kam luftuar me një çrregullim të rrallë parafilik për pjesën më të madhe të jetës sime dhe se turpi dhe frika më penguan të kërkoja ndihmën që më duhej”, shkroi ndër të tjera britaniku në letrën e tij, duke thënë se ishte i vendosur të provonte të bëhet një person më i mirë me trajtimin e duhur.
