Miss Shqipëria Drita Ziri fiton Miss Earth, duke u bërë shqiptarja e parë që fiton këtë konkurs dhe çdo konkurs të madh bukurie ndërkombëtar.
Shqiptarja Drita Ziri u kurorëzua “Miss Earth 2023” sot, më 22 dhjetor, në Vietnam. Ajo pasoi Mina Sue Choi të Koresë së Jugut, e cila mban titullin Miss Earth 2022.
Ziri mposhti 84 konkurrente të tjera që konkurruan për titullin Miss Earth – një nga katër konkurset kryesore ndërkombëtare në botë së bashku me Miss Universe, Miss World dhe Miss International.
Kjo e bëri atë mbretëreshën e 22-të të bukurisë që fitoi kurorën e shumë lakmuar të Miss Earth.
Ky sukses është i madh jo vetëm për bukuroshen shqiptare, por edhe për vetë Shqipërinë pasi për herë të parë arrihet ky rezultat në historinë e konkurseve madhore të bukurisë botërore.
Miss Earth është një konkurs vjetor ndërkombëtar që mbahet për të festuar “format e shumta të bukura dhe të ndryshme të faunës dhe për të promovuar më tej ruajtjen dhe mbrojtjen e planetit tonë”.
Drita Ziri do të shërbejë si ambasadore për mbrojtjen e mjedisit dhe do të udhëheqë projekte që ndihmojnë në përhapjen e ndërgjegjësimit për qëndrueshmërinë dhe vetëdijen ekologjike.
Modelja nga Fushë-Kruja është e bija e një personazhi të njohur në sportin shqiptar, Blerim Zirit, gjyqtarit të futbollit. Ziri vendosi mbi kokë kurorën e më të bukurës shqiptare vitin e kaluar kur u shpall Miss Shqipëria dhe që prej atij momenti në çdo event ajo ka përfaqësuar vendin tonë me kokën lart.
