Emisionet “Reality show” do të mund të shikohen në platformat televizive vetëm nëse e dini kodin njësoj si ndodh me filmat për të rritur.
Ky vendim është marrë sot nga Komisioni i Pavarur i Mediave ku është miratuar ndryshimi i Rregullores për Mbrojtjen e Fëmijëve dhe të miturve në shërbimet audio dhe audiovizuele, raporton “Betimi për Drejtësi”.
Kryetari i Bordit të KPM-së, Jeton Mehmeti ka thënë se është bërë vetëm plotësim ndryshimi i rregullores me qëllim të mbrohen fëmijët nga përmbajtjet që ndikojnë negativisht në shëndetin e tyre mendor e moral.
Ai ka thënë se është bërë përkufizimi i qartë se cfarë është dhuna si dhe janë bërë kategorizimet se cilat programe janë të përshtatshme për fëmijë e cilat jo.
“Mbrojtja e fëmijëve nga zhanret e reja televizive të emëruara si “reality show”. Mund të ndikojnë në gjuhën e tyre, sjelljet e tyre. Të gjitha programet “reality show” duhet të jenë të koduara”, ka thënë Mehmeti, në mbledhjen e 12-të të KPM-së.
Mehmeti ka treguar pse është parë e arsyeshme që këto programe të jenë të koduara.
Ndërsa ka thënë se nga përvoja që ka KPM, në këto programe ka pasur shprehje të dhunës, gjuhës vulgare e të tjera.
“Si bazë e kemi direktivën europiane që lejon rregullatorët të marrin masa më strikte për mbrojtjen e fëmijëve. E dyta Ligji i KPM-së ka disa nene që specifikojmë masat e duhura për mbrojtjen e fëmijëve. Dhe duke u nisur nga përvoja që kemi pasur me programet ‘reality show’ në Kosovë, ku kemi parë shprehje të dhunës, gjuhës vulgare, nudizmit etj, e kemi e parë të arsyeshme të vendosim këtë nen”- ka thënë ai.
Mehmeti ka thënë se kodi do të vendoset nga prodhuesi i programit dhe se rregulli do të vlejë për programet që janë duke u prodhuar ose do të prodhohen në të ardhmen.
“Ky rregull vlen edhe për programe që prodhohen diku tjetër e transmetohen në Kosovë”- ka thënë ai.
Muaj më parë, Komisioni i Pavarur për Media ka marrë disa ankesë në lidhje me programin televiziv ‘Big Brother’ që shfaqet në platformën “Artmotion”.
“Një prej ankesave ka qenë për ‘Big Brother’, se në orën 9:00 ka pasur debate te forta dhe promovim të cigares dhe tjetra ka të bëjë me transmetimin e përmbledhjeve ditore ku është pretenduar për shkelje të Kodit të Etikës” – ka thënë gjatë mbledhjes kryeshefi i KPM-së Faruk Rexhaj.
Anëtari i KPM-së, Besnik Berisha ka thënë se rregullorja është shumë e avancuar dhe do t’i mbrojë fëmijët nga përmbajtjet e dëmshme.
“Të zbatohen në përpikëmëri që të mbrohet interesi publik”.
